မောင်စွမ်းရည်
မန်းရာပြည့်၊ သခင်ကိုယ်တော်မှိုင်း ရာပြည့်၊ သခင်ဗသောင်း ရာပြည့်၊ သိပ္ပံမောင်ဝ ရာပြည့် စတဲ့ ရာပြည့် ပွဲတွေ အဆင့်ဆင့် ပါဝင်ဆင် နွှဲပြီးနောက် ကျနော် ပြည်ပရောက် လာတယ်။ ပြည်ပကို ရောက်လာပြီး တဲ့နောက် ဇော်ဂျီ ရာပြည့်၊ မင်းသုဝဏ် ရာပြည့်၊ ဦးသန့် ရာပြည့် စတဲ့ ရာပြည့်ပွဲ တွေကို တွေ့ကြုံ ဖြတ်သန်း ဆင်နွှဲ ရပြန် ပါတယ်။ နောက်နှစ်ဆိုရင် လူထုဦးလှ ရာပြည့်ပွဲ ပါတဲ့။ အဲသလို ရာပြည့်ပွဲတွေဟာ ကိုယ့်မျက်မှောက်မှာပဲ ဖျတ်ခနဲ ဖျတ်ခနဲ ကြုံတွေ့ဖြတ်သန်း လိုက်ရတော့ နှစ်တရာဆိုတာ ဘာမှ မကြာလိုက်ပါ လားလို့ ထင်ရပါတယ်။ကျနော် ပထမဆုံး တွေ့ကြုံဖြတ်သန်းခဲ့ရတဲ့ “ရာပြည့်” ဆိုတာက လူပုဂ္ဂိုလ် ရာပြည့် မဟုတ်ပါဘူး။ မြို့ရာပြည့်ပွဲပါ။ မန်းရာပြည့်ပွဲပါ။ မန်းမနီး ရေဝေး တောကျေးလက်မှာ မွေးဖွားခဲ့တဲ့ ကျနော်ဟာ မန်းရာပြည့်ပွဲကြီး ၀ှဲချီးကျင်းပချိန် မှာ မန်းရွှေမြို့က မန်းတက္ကသိုလ်ကို ရောက်နေပါပြီ။ မောင်ပေါက်စည်၊ မောင်သာနိုး၊ တင်မိုး၊ ကြည်အောင် စတဲ့ စာပေမွေ့ဖော်၊ ရဲဘော်သူငယ်ချင်းတွေနဲ့ လည်ပင်းဖက်ပြီး၊ နေ့ဆက်ညစဉ် ပျော်ပွဲတွေ ဆင်နေရသလို ပျော်ရွှင်စရာ ကာလကြီးပါပဲ။ ဗမာပြည်လေးရဲ့ ဒီမိုကရေစီ ရွှေပင်လေးဟာလည်း မကြာခင် နေ၀င်တော့မယ် ဆိုတာကို ကျနော်တို့လည်း မသိကြသေးဘူးပေါ့။
မန်းရာပြည့်ပွဲ ဆင်နွှဲမယ့် နှစ်မှာ ၁၉၅၈ ခုနှစ်က မန်းတက္ကသိုလ် ကျောင်းသား သမဂ္ဂ အမှုဆောင်အဖွဲ့ရဲ့ ကိုယ်စား ကျနော်က ရွေးကောက်ပွဲ အရာရှိအဖြစ်နဲ့ ၁၉၅၉ ခုနှစ်အတွက် အမှုဆောင်အဖွဲ့ အသစ်ကို ရွေးချယ်ပေး ရပါတယ်။ ကျောင်းသား ကိုယ်စားလှယ်အဖြစ် ကျနော်က ရွေးကောက်ပွဲကို စနစ်တကျ ဖြစ်အောင် လုပ်ပေးရုံသာဖြစ်ပြီး တရားမျှတ မှန်ကန်အောင် ကြီးကြပ်လုပ်ဆောင် ကြရတာကတော့ တက္ကသိုလ် ဆရာပါမောက္ခ တွေချည်းပဲ ဖြစ်ပါတယ်။ ကျနော်ဒီလို တာဝန်ကျ တာကလည်း တခြားအမှုဆောင် တွေဖြစ်တဲ့ ကိုသာလှ၊ ကိုသာနိုး၊ ကိုမိုးသူ ခေါ် ကိုစိန်မြင့် တို့လို တခြားကျောင်းသား ခေါင်းဆောင်တွေက အိမ်စောင့်အစိုးရ ခေါ် စစ်အစိုးရရဲ့ အစမ်းလေ့ ကျင့်ပွဲမှာ အဖမ်းအဆီး အထိန်းအသိမ်း ခံနေခဲ့ရလို့ပါပဲ။ မင်းတုန်းမင်းကြီးရဲ့ အာဏာသိမ်းပွဲ နှစ် (၁၀၀) ပြည့်ဟာ ဗိုလ်နေ၀င်း စစ်အစိုးရရဲ့ အစမ်းလေ့ကျင့် အာဏာသိမ်းပွဲရဲ့ အစနဲ့ တိုက်ဆိုင်နေခဲ့ပါတယ်။
မန္တလေးတက္ကသိုလ်ရဲ့ ကျောင်းသားသမဂ္ဂ အမှုဆောင် ရွေးကောက်ပွဲများ သမိုင်းမှာ မဲအများဆုံး စံချိန်တင် ခဲ့သူက တော့ ၁၉၅၉ ခုနှစ်ရဲ့ ရွေးကောက်ပွဲမှာ ဥက္ကဋ္ဌအဖြစ် အရွေးခံခဲ့ရတဲ့ ကဗျာဆရာ မောင်ပေါက်စည် (မန်းတက္ကသိုလ်) ဘွဲ့ခံ အင်ဒရူး မြဟန်ပါပဲ။ သူက ခရစ်ယာန်ပါ။ နောင်အခါ သူဟာ ဗမာပြည် အင်္ဂလိကန် ခရစ်ယာန်ဂိုဏ်းရဲ့ သာသနာပိုင်ချုပ် ဖြစ်လာခဲ့ပါ တယ်။ ဒက်စမွန်တူတူတို့နဲ့ အပြိုင်ပေါ့။ မောင်ပေါက်စည် ဒက်စမွန်တူတူ တို့လိုပဲ ငြိမ်းချမ်းရေးကိစ္စမှာ ပါဝင်ဆောင်ရွက်တဲ့ အနေနဲ့ ကရင်ဗိုလ်ချုပ်ကြီး ဗိုလ်မြကို သွားရောက်တွေ့ဆုံ ဆွေးနွေး ခဲ့ပါသေးတယ်။ ဒါပေမယ့် မအောင်မြင်ခဲ့ပါ။
မောင်ပေါက်စည် အကြောင်းကို ခုလို ပြောပြနေရတာက သူဟာ မန်းရာပြည့်ပွဲနဲ့ တိုက်ဆိုင်တဲ့ ကာလမှာ ကျနော် တို့ရဲ့ ဥက္ကဋ္ဌ ဖြစ်နေလို့ပါ။ ကဗျာဆရာ ဖြစ်နေတဲ့အတွက် မန်းရာပြည့်ပွဲကို ကဗျာနဲ့ပဲ ပါဝင်ဆင်နွှဲခဲ့ပါတယ်။ အဲဒီတုန်းက ကဗျာဆရာ တင်မိုးကလည်း တင်မိုးဖြစ်စ အခါပေ့ါ။ တက္ကသိုလ်ရဲ့ ဂုဏ်ထူးဆောင် ကဗျာဆရာနှစ်ဦး အနေနဲ့ မန်းရာပြည့် အထိမ်းအမှတ် ကဗျာစာအုပ် ကလေးတအုပ်ကို ကျောင်းသားသမဂ္ဂအနေနဲ့ ပုံနှိပ်ထုတ်ဝေ ခဲ့ပါတယ်။ အဲဒီ စာအုပ်ထဲမှာ စာအုပ်ကလေးကို တာဝန်ခံပြီး ရိုက်သူက တင်မိုးပါမှန်း မသိလို့ဆိုပြီး မောင်ပေါက်စည် ရဲ့ နာမည်တခုတည်းသာ မျက်နှာဖုံးမှာ တင်ခဲ့ပါတယ်။ နောင်အခါ မောင်ပေါက်စည်ရဲ့ ကဗျာပေါင်းချုပ်စာအုပ်ကို ကျနော်ရွေးချယ် ထုတ်ဝေတော့မှ တင်မိုးနဲ့ ကျနော်တို့က သူ့ကဗျာတွေချည်း သီးသန့်ရွေးထုတ်ပြီး သူ့ကဗျာစာအုပ် ထဲမှာ ရှေ့ဆုံးက ထည့်ပေးခဲ့ပါတယ်။
မန္တလေးတောင်ခြေမှာ ရာပြည့်ပွဲတော်ကို အကြီးအကျယ် ကျင်းပပါတယ်။ ပွဲတော်မှာ ပြပွဲပြိုင်ပွဲတွေလည်း အကြီးအကျယ် လုပ်ပါတယ်။ “သက်တံ့ပေါ်မှာ ကစားမယ်ဆိုတဲ့ သီချင်းနဲ့ ကျော်ကြားလာတဲ့ မာမာအေး ကလေးကလည်း သူ့အသက်က (၁၅) နှစ် (၁၆) နှစ်ရှိမှာပေါ့။ သူ့ဆရာ လင်းစေလုလင်ရဲ့ စစ်ရဲ ဂီတအဖွဲ့နဲ့ လိုက်ပါပြီး အဖွဲ့ဝင်တွေရဲ့ ဂီတပြိုင်ပွဲမှာ သီချင်း လိုက်ဆိုပေးဖို့ ပါလာခဲ့သတဲ့။ သူ့ဆရာတွေက ၀င်မပြိုင်နဲ့ဆိုလို့ မပြိုင်ခဲ့ပေမယ့် သူ့အသံကတော့ မန်းရာပြည့်မှာ လွှမ်းသွား ခဲ့ပါတယ်။ ရာပြည့်ပွဲကြီး ပြီးတော့ ပြပွဲကွင်းကြီးဟာ သမိုင်းဝင် ရာပြည့်ကွင်းကြီးအဖြစ် ကျန်ရစ်ခဲ့ပါတယ်။ ရွှေမန်းသူ ရွှေမန်းသားတွေဟာ ဒီကွင်းကြီးမှာ စက်ဘီးစီးကြ၊ ကားမောင်းကြနဲ့ ကစားကွင်းကြီး သဖွယ်လည်း ဖြစ်ခဲ့ပါတယ်။ နောင်အခါ ပွဲတွေကျင်းပဖို့လည်း အလွန်ကောင်းတဲ့ ကွင်းကြီးပါပဲ။ ဒါပေမယ့် စစ်ဗိုလ်ချုပ်တွေက လူစုစုလုပ်နိုင်တဲ့ နေရာတွေကို အစိတ်စိတ်ပိုင်းပြီး လူမစုနိုင်အောင် ပိတ်ဆို့ပစ်ခဲ့ပါပြီ။
မန်းရွှေမြို့ကြီးကို တည်ထောင်တဲ့နှစ်ကို “အုတ်ကျစ် ကျော်အေး မန္တလေး” ၊ “အောင်ကျော် ချမ်းအေး မန္တလေး” ဆိုပြီး နံသင့် သင်္ချာနည်းနဲ့ မှတ်သားခဲ့ကြရပါတယ်။ ၁၂၂၁ ခုနှစ် ကဆုန်လပြည့်ကျော် (၆) ရက်နေ့မှာ တည်ပါတယ်။ ၁၃၂၁ ခုနှစ် ၁၉၅၉ ခုနှစ်မှာ နှစ် (၁၀၀) ပြည့်ပါတယ်။ ပွဲတော် ကျင်းပတဲ့အခါ ပွဲတော်လာပရိသတ် များ သွားရေးလာရေး အဆင်ပြေအာင် ခြေခင်းလက်ခင်း သာယာတဲ့ တန်ဆောင်မုန်းလ ကျတော့မှ လဆန်း (၈) ရက်က (၁၄) ရက်နေ့အထိ ကျင်းပပါတယ်။
ပွဲတော် ကျင်းပရေးအတွက် လူထုသတင်းစာ၊ ပဟိုရ်စည် သတင်းစာတို့က ဦးဆောင်
လှုံ့ ဆော်ခဲ့ပါတယ်။ မန်းရာပြည့် အတွက် စာပေယဉ်ကျေး မှုကိစ္စ၊ သမိုင်းရာဇ၀င် အချက်အလက် ကိစ္စတွေမှာ ဆရာကြီး ရွှေပြည် ဦးဘတင်၊ ရတနာပုံ ဖိုးမှတ်စု ခေါ် ရွှေကိုင်းသား ခေါ် သုတေသီ ဆရာတော် ဦးသောဘိတနဲ့ လူထုဦးလှ၊ လူထုဒေါ်အမာ တို့က ဦးဆောင် စုဆောင်း ဖော်ထုတ် ကြပါတယ်။ အဲဒီတုန်းက စုဆောင်းရိုက်နှိပ် ထုတ်ဝေခဲ့ ဆရာတော် ရွှေကိုင်းသားရဲ့ “အနှစ် (၁၀၀) ပြည့် မန္တလေး” ဆိုတဲ့ စာအုပ်ကြီးဟာ မန္တလေး နှစ် (၁၀၀) ပြည့် သမိုင်းအတွက် အစုံဆုံး စာအုပ်ကြီးပါပဲ။ ဒီစာအုပ်ကြီးကို မန္တလေး နှစ် (၁၅၀) အကြိုအဖြစ် မန္တလေး လူထုကြီးပွားရေး စာအုပ်တိုက်က ၂၀၀၇ ခုနှစ်မှာ ဒုတိယအကြိမ် ပြန်လည် ထုတ်ဝေတာကို တွေ့ရတော့ အထူးဝမ်းသာ ရတယ်။ ဒါပေမယ့် ဒီစာအုပ်မှာ ကျမ်းကို စရင်းနဲ့ အက္ခရာဝလိ အညွှန်းမပါတာ မကောင်းဘူး။ မူလကတည်းက “ကျမ်းလေးအံ့ခိုး၍” လို့ ကျမ်းပြုသူက ဖော်ပြ တောင်းပန် ထားပါတယ်။ နောက်တခါ ထုတ်ရင် အညွှန်းထည့်ပေးမှ ခေတ်မီပါမယ်။မန္တလေးမြို့ကြီးကို ပြန်စဉ်းစားရင် ပစ္စင်ပြအိုး၊ မြို့ရိုးနီကြန်ကြန်က ကျုံးပတ်လည်ရံ နေတာကို မျက်စိထဲမှာ မြင်ယောင် တယ်။ ကျုံးရဲ့ အနောက်တောင် ထောင့်မှာ စနေနေ့ညတိုင်း ဖျော်ဖြေတဲ့ မြို့မဂီတ အသင်းကြီး ကိုလည်း မြင်ယောင် ကြားယောင်တယ်။ မန္တလေးတောင်ပေါ် တက်ကြည့်ပြီး ပြလမ်းတွေနဲ့ အကွက်ကျကျ တည်ဆောက်ထား တဲ့ မန္တလေးမြို့ကြီး ကို တောင်ပေါ်အထက်စီးက မျှော်ကြည့်ရတဲ အရသာကိုလည်း မမေ့နိုင်ပါဘူး။ မြို့ရိုးရဲ့ မြောက်မျက်နှာဟာ ဖျက်ဆီးမှု အများဆုံးပါပဲ။ ဗြိတိသျှ စစ်တပ်က “ကလေးကစားတဲ့ ခံတပ်လေးလိုပဲ” မှတ်တမ်းရေးပြီးမှ မြို့ရိုးအတွင်းရှိ ဂျပန်တပ်ကို တိုက်ဖို့ မြို့ရိုးကို နေ့ညမပြတ် (၄၊ ၅) ရက် အမြောက်နဲ့ ထု၊ ဗုံးကြဲဖျက်ဆီးခဲ့တဲ့ သမိုင်းကိုလည်း မမေ့ပါဘူး။ သူတို့က အုတ်ချပ်ကလေးတွေ ထောင်ထား ရုံပဲလို့ ထင်သလား မသိ။ အုတ်မြို့ရိုးနောက်က မြေကြီးတွေ ဆင်ခြေလျှော ဖို့ပြီး ကျားကန် ထားတာကိုမှ မသိဘဲ။
မန္တလေးမြို့ရိုးအတွင်းမှာ အကျဉ်ထောင်ကြီး ရှိခဲ့ဖူးတယ်။ အိန္ဒိယက တော်လှန်ရေးသမား ဆုဘတ်ချန္ဒရာဘိုစ့်၊ သခင်နု၊ မြသန်းတင့်၊ လူထုဦးလှ၊ မောင်သာနိုး၊ မောင်သာရ၊ ဒေါက်တာ ဇော်မင်းတို့အပြင် ကျနော် ဖခင်လည်း ရောက်ရှိ နေထိုင်ခဲ့ရဖူးတာကို ကျနော် သတိရနေပါတယ်။ (ဒီအထဲကို မောင်စွမ်းရည်တယောက် ဘာကြောင့် မရောက်ခဲ့ရသလဲလို့ အားမလိုအားမရ မေးလာကြတဲ့ သူတွေလည်း ရှိရဲ့။)
မန္တလေးမြို့ရဲ့ သမိုင်းကို ရာပြည့် နှစ်ထိ ပြုစုဖို့ ဆရာတော် ရွှေကိုင်းသားတို့ တာဝန်ကျေခဲ့ပြီ။ ထုတ်ဝေတဲ့ ကြီးပွားရေး လူထုတိုက်ကလည်း တာဝန်ကျေခဲ့ပါပြီ။ လူထုဒေါ်အမာက မန္တလေးဇာတ်သဘင် လောကနဲ့ အငြိမ့်လောက၊ သာသနာ လောကနဲ့ ပန်းချီလောက က ပုဂ္ဂိုလ်တွေအကြောင်းကို အတော်စုံစုံလင်လင် ပြုစုခဲ့ပါပြီ။ မန္တလေးမြို့ပေါ်က စီးပွားရေး၊ လူမှုရေး၊ နိုင်ငံရေး စတဲ့ ဘက်စုံက ပုဂ္ဂိုလ်တွေ အကြောင်းတွေလည်း သစ်ပင်စိုက်တဲ့ ဆိုက္ကားဆရားကြီးပါ မကျန် အတော်ကလေး စုံအောင် ရေးသားခဲ့ပါပြီ။ မန္တလေးမြို့ရဲ့ ကျက်သရေဆောင် မန္တလေးမြို့မအသင်း၊ မန္တလေးမြို့ရဲ့ ဂုဏ်ရောင်ဆောင်ခဲ့တဲ့ မန္တလေး အမျိုးသားကျောင်း တို့လည်း အတော်စုံခဲ့ပါပြီ။
မပြုရသေးလို့ ပြုစုရမယ့် အကြောင်းအရာ တွေလည်း အများကြီး ကျန်ပါသေးတယ်။ ဥပမာ မန္တလေးမှာ ဦးရာဇတ်နဲ့ ဦးလှတို့ ဦးဆောင်ခဲ့တဲ့ ဖဆပလနဲ့ အာရှလူငယ် အသင်းတို့ရဲ့ ဖက်ဆစ် တော်လှန်ရေး လှုပ်ရှားမှုသမိုင်း၊ မန္တလေး အကျဉ်းထောင် သမိုင်း၊ အထက်ဗမာနိုင်ငံရေး စာရေးဆရာအသင်းနဲ့ သတင်းစာ ဆရာ အသင်းသမိုင်း၊ မန္တလေးက ရတနာပုံ သတင်းစာက အစ လူထုသတင်းစာ၊ ပဟိုရ်စည် သတင်းစာ၊ မန္တလေး ဟံသာဝတီ သတင်းစာ အပါအ၀င် သတင်းစာတွေရဲ့ သမိုင်း၊ တင်မိုးရဲ့ ဖန်မီးအိမ် စာအုပ်တိုက်၊ သပြေစာ အုပ်တိုက်နဲ့ မောင်မိုးသူရဲ့ မိုးဦးပန်း စာအုပ်တိုက် အပါအ၀င် မန္တလေးရဲ့ စာအုပ်ထုတ်ဝေရေး သမိုင်း၊ မန္တလေး တက္ကသိုလ် ကလောင်ရှင် သမိုင်း၊ ဦးဝင်းဖေပါတဲ့ ပန်တျာကျောင်းသမိုင်း စတဲ့ အကြောင်းအရာ တွေပါပဲ။
ခုအခါမှာ ရွှေကိုင်းသာရဲ့ မန္တလေးသမိုင်း ထဲမှာပါတဲ့ ပြည်တော်ဝင် သီချင်းစတဲ့ မြို့မအသင်း နောက်ခံ ၀တ္ထုတပုဒ်ကို ဆူးငှက်ကရေးတယ်။ အဲဒါက အမျိုးသားစာပေ ဆုရသွားသတဲ့။ ဆူးငှက်ဆိုတာ မန္တလေးရဲ့ မျဉ်းဖြောင့်များဆိုတဲ့ စာအုပ်ကိုလည်း ပြုစုခဲ့သူ ဖြစ်ပါတယ်။ နောက်တဦးက ကျော်ရင်မြင့်ပါ။ သူရဲ့ “ဘ၀ဇာတ်ခုံ အဖုံဖုံ” ဆိုတဲ့ စာအုပ် ကလည်း ဆုရသတဲ့။ ဒီစာအုပ်က ဒုတိယ စာအုပ်ပါ။ အရင် စာအုပ်ရော၊ ဒီစာအုပ်ရော နှစ်အုပ်လုံး ကောင်းပါတယ်။ အထူးသဖြင့် ရိုးသားကြိုးစားမှုကို ဖော်ထုတ် အမွှမ်းတင်ထားတာ ချီးကျူးစရာပါ။ မြို့တော် မောင်ယဉ်အောင် ကလည်း ဒါရိုက်တာဆု ရသတဲ့။ ဘောလုံးသင်းကလည်း ဆုရသတဲ့။ ဘာပဲဖြစ်ဖြစ် မန္တလေးနှစ် (၁၅၀) ပြည့်အတွက် ဂုဏ်ယူစရာတွေပါပဲ။ ဂုဏ်ယူထိုက်တာ ဂုဏ်ယူခြင်း၊ ပူဇော်ထိုက်သူ ပူဇော်ခြင်းဆိုတာ လူ့ယဉ်ကျေးမှုပဲ မဟုတ်ပါလား။ ဂုဏ်ယူစရာတွေ မန်းနှစ် (၁၅၀) အတွက် များထက်များပါစေ။
ခေတ်ပြိုင်မှ
